Këtë vit, kryeqyteti i Shqipërisë, Tirana nga data 21 deri më 24 shtator priti Festivalin Ndërkombëtar të Kukullave. Në festival, ku morën pjesë artistë të kukullave nga Shqipëria, Turqia, Italia, Irlanda, Greqia, Kina dhe Spanja, u prezantuan para publikut shfaqje tradicionale dhe bashkëkohore të kukullave.

Festivali, i cili solli së bashku kultura të ndryshme përmes muzikës, humorit dhe artit të kukullave, u pasurua edhe me pjesëmarrjen e artistëve turq të teatrit të hijeve, Suat Veral dhe Merve İlken, me mbështetjen e Institutit Yunus Emre në Tiranë.

Personazhet tradicionale të teatrit turk të hijeve, Karagöz dhe Hacivat, u takuan me publikun më 24 shtator, të enjten, në orën 10.00, në Teatrin e Kukullave në Tiranë, me shfaqjen “Hijet Gjigante“. Shfaqja, e ndjekur me interes nga fëmijët dhe të rriturit, solli momente të këndshme dhe plot ngjyra.

Pas shfaqjes, Suat Veral dhe Merve İlken përshëndetën publikun para perdes dhe bashkëbiseduan me spektatorët rreth shfaqjes. Fëmijët që ndoqën shfaqjen në sallë patën mundësinë të ngjiteshin në skenë dhe të shihnin nga afër kukullat e Karagözit, Hacivatit dhe personazheve të tjera të shfaqjes. Gjithashtu, ata morën informacion nga artistët mbi procesin e punimit të kukullave.

Pas realizimit të një fotografie të përbashkët me artistët dhe pjesëmarrësit shfaqja përfundoi me duartrokitje.