Ndërmjet Institutit Yunus Emre dhe një prej institucioneve arsimore më prestigjoze në Shqipëri, Gjimnazit me Orientim Gjuhësor “Asim Vokshi”, u nënshkrua Protokolli i Bashkëpunimit për Projektin “Turqishtja Zgjedhja ime”.

Në ceremoninë e nënshkrimit, të zhvilluar në Gjimnazin me Orientim Gjuhësor “Asim Vokshi”, morën pjesë Ambasadori i Republikës së Turqisë në Tiranë, Barış Ceyhun Erciyes; Zëvendësministrja e Arsimit e Republikës së Shqipërisë, Orjana Osmani; Këshilltari për Arsimin pranë Ambasadës së Republikës së Turqisë në Tiranë, Gökmen Aksakal; Drejtoresha Rajonale e Arsimit Parauniversitar Tiranë, Ermira Milori; Drejtoresha e Gjimnazit me Orientim Gjuhësor “Asim Vokshi”, Marsida Jarani; Koordinatori i TİKA-s në Tiranë, Murat Ölçenoğlu; dhe Koordinatori i Institutit Yunus Emre Tiranë, Oğuzhan Sakoğlu.

Para ceremonisë së nënshkrimit, Ambasadori i Republikës së Turqisë në Tiranë, Barış Ceyhun Erciyes, dhe Zëvendësministrja e Arsimit e Republikës së Shqipërisë, Orjana Osmani, zhvilluan një bashkëbisedim me nxënësit, gjatë të cilit theksuan kontributin që ky protokoll sjell në zhvillimin e marrëdhënieve dypalëshe dhe u uruan nxënësve suksese. Nxënësit interpretuan poezi dhe lexuan krijime në turqisht, si dhe i dorëzuan Ambasadorit Erciyes një dhuratë të përgatitur prej tyre.

Pas nënshkrimit të protokollit, të ftuarit vizituan laboratorin e turqishtes, i mundësuar me mbështetjen e TİKA-s. Pas bashkëbisedimit me nxënësit, u realizua një fotografi e përbashkët.

Në kuadër të protokollit të nënshkruar, Instituti Yunus Emre dhe Gjimnazi me Orientim Gjuhësor “Asim Vokshi” do të zhvillojnë aktivitete të përbashkëta me synim rritjen e cilësisë së mësimdhënies së turqishtes, zgjerimin e mundësive të nxënësve për të mësuar turqisht dhe forcimin e bashkëpunimit në fushën e arsimit.